Hududning xalqaro maydondagi tanilishi nafaqat sayyohlar, balki investorlar va hamkorlar e’tiborini jalb etishda ham muhim omil sanaladi. Shu nuqtai nazardan, Surxondaryoda olib borilayotgan navbatdagi media loyiha viloyat salohiyatini dunyoga namoyish etishga xizmat qiladi.
Dunyoning nufuzli “EURONEWS” telekanali ijodkorlari Surxondaryoda tasvirga olish ishlarini amalga oshirmoqda. Suratga olish jarayonlari Qattaqum yarimcho‘lining noyob tabiati, Qumqo‘rg‘ondagi intensiv olma bog‘lari hamda Jarqo‘rg‘ondagi yirik bodomzorlarda tashkil etildi.
Maxsus dasturda viloyatning ekologik boyligi, zamonaviy bog‘dorchilik tajribasi, agrar islohotlar, turizm imkoniyatlari va investitsiyaviy jozibadorligi yoritiladi. Avgust oyida efirga uzatiladigan ko‘rsatuv Surxondaryoning tabiiy va iqtisodiy salohiyatini millionlab xalqaro tomoshabinlarga tanitishga xizmat qiladi.
