Uzun tumanida “Tashabbusli byudjet – 2025” loyihasi doirasida bunyod etilgan Surxondaryo viloyati Ko‘zi ojizlar maxsus kutubxonasining filial binosini foydalanishga topshirishga tayyorgarlik ishlari ko‘zdan kechirildi.
Mas’ullar ishtirokida o‘tkazilgan uchrashuvda binoni foydalanishga qabul qilish, uni zarur jihozlar va yangi adabiyotlar bilan ta’minlash, shuningdek, barcha toifadagi kitobxonlar uchun to‘siqlarsiz muhit yaratish masalalari muhokama qilindi. Aniqlangan kamchiliklarni qisqa muddatda bartaraf etish yuzasidan tegishli vazifalar belgilandi.
Yangi bino hajman ixcham bo‘lsa-da, unda kitobxonlar va kutubxonachilar uchun qulay sharoitlar yaratilgan. Mazkur filial foydalanishga topshirilgach, respublikada ko‘zi ojiz kitobxonlar uchun yangidan qurilgan ilk maxsus filial kutubxonalaridan biri sifatida kutubxonachilik tizimida muhim o‘rin egallashi kutilmoqda.
