Yoshlarni sportga keng jalb etish va ularning xalqaro maydonlarda raqobatbardosh bo‘lib kamol topishi yo‘lida erishilayotgan yutuqlar tobora ortib bormoqda. Bu borada Sariosiyo tumani yosh sportchilari navbatdagi muvaffaqiyatni qo‘lga kiritdi.
Samarqand viloyatida Karate-ITKF sport turi bo‘yicha o‘tkazilgan O‘zbekiston chempionatida O‘zbekiston professional va havaskor K-1 federatsiyasining Surxondaryo viloyati rahbari Abdug‘ani Rajabov, Sariosiyo tumani “Kelajak” markazi direktor o‘rinbosari Sharofiddin Begaliyev, karate-do to‘garagi rahbarlari Muhammadjon Nusratullayev va Fazliddin Mirzamurodov boshchiligidagi 19 nafar sportchi ishtirok etdi.
Musobaqa yakunlariga ko‘ra, sariosiyolik karatechilar ustozlari bildirgan ishonchni oqlab, 10 ta oltin, 5 ta kumush va 4 ta bronza medalini qo‘lga kiritib, tumanning sport salohiyatini yana bir bor namoyon etdilar. Ushbu natija yosh sportchilarning mahorati, murabbiylarning samarali mehnati hamda yurtimizda sportni rivojlantirishga qaratilayotgan e’tiborning amaliy samarasidir.
