Yosh sportchilarni professional tayyorlash va ularning xalqaro maydondagi raqobatbardoshligini oshirishga qaratilgan amaliy mashg‘ulotlar sport rivojida muhim o‘rin tutadi.
Shu maqsadda Denov tuman sport maktabida karate WKF yo‘nalishi bo‘yicha shug‘ullanayotgan yoshlar uchun Xalqaro toifadagi sport ustasi Quvonch Muxammadiyev ishtirokida master-klass tashkil etildi.
Mahorat darsida sportchilarga zamonaviy texnik va taktik usullar, hujum va himoya elementlari hamda musobaqalarda samarali harakatlanish bo‘yicha amaliy tavsiyalar berildi. Shuningdek, xalqaro musobaqalarda muvaffaqiyat qozonish uchun zarur bo‘lgan sport intizomi, psixologik tayyorgarlik va tajriba almashishga alohida e’tibor qaratildi.
Bunday master-klasslar yosh karatechilarning mahoratini oshirish, ularni nufuzli musobaqalarga puxta tayyorlash hamda kelajak chempionlarini tarbiyalashda muhim ahamiyat kasb etmoqda.
