Jamiyatning mehr-e’tibori va g‘amxo‘rligi nogironligi bo‘lgan bolalarning hayotida muhim o‘rin tutadi. Ularni qo‘llab-quvvatlash, mustaqil hayotga tayyorlash va jamiyatga moslashtirish insonparvarlikning eng yorqin ko‘rinishidir.
Qumqo‘rg‘on tumanidagi nogironligi bo‘lgan bolalar uchun tashkil etilgan “Muruvvat” uyida bugungi kunda 131 nafar aqliy rivojlanishida nuqsoni bo‘lgan bola tarbiyalanmoqda. Bu yerda ular uchun tibbiy parvarish, reabilitatsiya hamda ijtimoiy moslashuv ishlari tizimli yo‘lga qo‘yilgan.
Bolalar qo‘l mehnati, tikuvchilik va oshpazlik kabi yo‘nalishlarda o‘z imkoniyatlarini sinab ko‘rib, hayotiy ko‘nikmalarni egallamoqda. Eng muhimi, ularda ertangi kunga ishonch va mustaqil hayotga intilish shakllanmoqda. Olib borilgan sa’y-harakatlar natijasida ayrim bolalarning o‘z oilasi bag‘riga qaytayotgani esa bu ezgu ishlarning amaliy natijasidir.
