Xalqaro xotin-qizlar kuni munosabati bilan Ko‘ksaroyda o‘tkazilgan tadbirda Prezident Shavkat Mirziyoyev xotin-qizlarni zamonaviy kasblar va IT sohasiga o‘qitish, ularni tadbirkorlikka keng jalb etish bo‘yicha yangi tashabbuslarni e’lon qildi.
Yangi “Daromadli ayol” dasturi doirasida 50 ming nafar ayol kasanachilik, hunarmandchilik, parrandachilik, asalarichilik hamda tomorqachilik yo‘nalishlarida band qilinadi. Shuningdek, “Hamroh” dasturi orqali 3 mingta loyiha uchun 1 trillion so‘m mablag‘ ajratilishi rejalashtirilgan.
Joriy yilda 1,5 million nafar ayolni daromadli qilish, 400 ming nafarini biznes faoliyatiga jalb etish maqsad qilingan. Ushbu tashabbuslarni amalga oshirish uchun 25 trillion so‘mdan ortiq moliyaviy resurs yo‘naltiriladi.
Mazkur dastur xotin-qizlar bandligini ta’minlash, ularning iqtisodiy faolligini oshirish hamda oilalar farovonligini mustahkamlashda muhim ahamiyat kasb etadi.
