Termiz tumanida qishloq xo‘jaligida yuqori natijalarga erishayotgan fermerlar tajribasini ommalashtirish maqsadida amaliy seminar tashkil etildi. Tadbir “Durdona Namuna fermer xo‘jaligi” dalasida bo‘lib o‘tdi.
Seminar davomida xo‘jalikda qo‘llanilayotgan ilg‘or agrotexnologiyalar, yerga ilmiy yondashuv asosida ishlov berish hamda agrotexnik tadbirlarni o‘z vaqtida amalga oshirish natijasida paxtadan 45 sentner, g‘alladan esa 70 sentnerdan ortiq hosil olinayotgani ta’kidlandi. Shuningdek, hududda tashkil etilgan o‘quv-tajriba maydonida zamonaviy va resurs tejamkor usullar amaliyotga joriy etilgani qayd etildi.
Tadbir davomida fermerlar yer unumdorligini oshirish, suvdan oqilona foydalanish va yuqori hosildor navlarni yetishtirish bo‘yicha tajriba almashdilar. Bunday amaliy seminarlar qishloq xo‘jaligida samaradorlikni oshirish hamda ilg‘or tajribalarni keng joriy etishda muhim ahamiyat kasb etadi.
