Maktabgacha va maktab ta’limi vaziri o‘rinbosari Farhod Boqiyev ayni kunlarda Surxondaryo viloyatida bo‘lib turibdi. Tashrif doirasida hududlardagi ta’lim-tarbiya jarayoni, asosan, ma’naviy-ma’rifiy ishlar samaradorligi o‘rganildi. Jumladan, Qiziriq hamda Angor tumanlaridagi maktablarda amalga oshirilayotgan ma’naviy-ma’rifiy ishlar holati va “Jasorat sinflari” faoliyati bilan yaqindan tanishildi.
O‘quv muassasalarida yoshlarni milliy qadriyatlarga hurmat, vatanparvarlik, ma’naviy barkamollik ruhida tarbiyalash, kitobxonlik madaniyatini yuksaltirish, targ‘ibot va tashviqot ishlarini samarali tashkil etish borasida olib borilayotgan ishlar tahlil qilindi. Shuningdek, “Kelajak soatlari”, tarbiyaviy tadbirlar, davra suhbatlari va uchrashuvlarning mazmun jihatidan boyitilishi, zamonaviy yondashuvlar asosida tashkil etilishi yuzasidan tegishli tavsiya va ko‘rsatmalar berildi.
