O‘zbekistonda oliy ta’lim muassasalari bitiruvchilarining bandligini ta’minlash va yoshlar tashabbuslarini qo‘llab-quvvatlash maqsadida tadbirkorlarga 5 milliard so‘mgacha imtiyozli kredit ajratiladi.
Kredit 7 yil muddatga, shu jumladan 2 yillik imtiyozli davr bilan beriladi. Uning yillik stavkasi Markaziy bank stavkasidan 4 foiz yuqori etib belgilangan. Muhimi, har 1 milliard so‘m kredit uchun tadbirkor kamida 1 nafar bitiruvchini ishga olishi shart bo‘ladi. Agar ish shartnomasi 2 yil ichida bekor qilinsa, kredit stavkasi tijorat darajasiga oshiriladi.
Shuningdek, eng yaxshi startap va innovatsion loyiha mualliflari uchun ham yangilik — ular 1 milliard so‘mgacha grant olish imkoniyatiga ega bo‘lib, buning evaziga kamida 2 nafar bitiruvchini ish bilan ta’minlashi lozim.
Mazkur tashabbus yosh mutaxassislarning mehnat bozoriga muvaffaqiyatli kirib kelishini ta’minlash, tadbirkorlik muhitiga yangicha g‘oya va energiya olib kirish orqali iqtisodiyotga sezilarli turtki berishi kutilmoqda.
