Sanʼat inson qalbiga ezgulik urug‘ini qadab, uni go‘zallik va yaxshilik sari chorlaydi. Ayniqsa, teatr — bu shunchaki tomoshaxona emas, balki tarbiya, madaniyat va maʼrifat maskani sifatida jamiyat hayotida beqiyos o‘rin tutadi.
Shu maqsadda Termiz davlat pedagogika instituti talabalari Surxondaryo viloyat qo‘g‘irchoq teatrida mehmon bo‘lishdi. Ular teatr jamoasi tomonidan sahnalashtirilgan “Firibgar” spektaklini tomosha qilishdi.
Mazkur asarda bugungi kunning dolzarb muammolaridan biri — mehnatsiz oson pul topishga intilish oqibatlari yoritib berildi. Asardagi qahramonlar xatolarini anglagach, hayotda to‘g‘ri yo‘lni tanlash zarurligini tushunadi. Tomosha yosh tomoshabinlarga chuqur hayotiy saboq bo‘ldi.
Spektakl so‘ngida talaba-yoshlar ham qahramonlarning taqdiridan o‘zlariga xulosa chiqarib, jamiyatda mehnatsevarlik, halollik va masʼuliyatning naqadar muhim ekanini anglab yetishdi.Teatr tomoshasi yig‘ilganlarda katta taassurot qoldirdi, ularning qalbida ezgu fikr va ijobiy tuyg‘ular uyg‘otdi. Bu kabi madaniy-maʼrifiy tadbirlar yoshlarning nafaqat dunyoqarashini kengaytiradi, balki ularni jamiyatda faol, masʼuliyatli shaxs bo‘lib kamol topishga undaydi.
