Axborot texnologiyalari bugun iqtisodiyotning yangi imkoniyatlarini ochayotgan, hududlar taraqqiyoti va yoshlar bandligini ta’minlashda muhim omilga aylanayotgan sohalardan biridir. Shu bois Surxondaryoda ham IT yo‘nalishiga xorijiy investitsiyalarni jalb qilish, zamonaviy texnologiyalarni joriy etish va xalqaro tajriba asosida malakali kadrlar tayyorlashga alohida e’tibor qaratilmoqda.
Joriy yilning 29–31-oktabr kunlari Qozon shahrida o‘tkazilgan xalqaro «Kazan Digital Week 2026» forumida Surxondaryo viloyati delegatsiyasining ishtiroki ushbu yo‘nalishdagi hamkorlikni kengaytirishda muhim qadam bo‘ldi.
Forum doirasida 20 ga yaqin xorijiy IT-kompaniya vakillari bilan muzokaralar o‘tkazildi. Natijada 6 ta yirik IT-kompaniyaning viloyatda o‘z filiallarini tashkil etishi bo‘yicha ikki tomonlama kelishuvlar imzolandi. Shuningdek, 10 dan ortiq kompaniya bilan axborot texnologiyalari, sun’iy intellekt va zamonaviy robototexnika yo‘nalishlarida texnologik loyihalarni amalga oshirish yuzasidan hamkorlik aloqalari o‘rnatildi.
Tashrif davomida kadrlar tayyorlash va xalqaro tajriba almashish masalalari ham muhokama qilindi. Xususan, Tatariston Respublikasi Fanlar akademiyasi prezidenti bilan uchrashuvda Surxondaryo yoshlari uchun axborot texnologiyalari yo‘nalishida xalqaro amaliyot dasturini yo‘lga qo‘yish bo‘yicha kelishuvga erishildi.
Erishilgan kelishuvlarning ahamiyati shundaki, ular viloyatda IT infratuzilmasini kengaytirish, yangi ish o‘rinlarini yaratish, yoshlarni zamonaviy kasblarga tayyorlash va ularning xalqaro mehnat bozorida raqobatbardoshligini oshirish uchun yangi imkoniyatlar ochadi. Eng muhimi, xalqaro kompaniyalar bilan hamkorlik Surxondaryoning raqamli iqtisodiyotdagi salohiyatini ro‘yobga chiqarishga xizmat qiladi.
