O‘zbekistonda yo‘l harakati xavfsizligini ta’minlashga oid hukumat qarori loyihasi jamoatchilik muhokamasiga qo‘yildi. Loyihaga ko‘ra, 2026-yil 1-yanvardan ishlab chiqarilganiga 50 yil to‘lgan avtomoto-transport vositalaridan foydalanish taqiqlanadi. Bunday transport vositalari davlat ro‘yxatidan chiqariladi va qayta ro‘yxatdan o‘tkazilmaydi. Antikvar avtomobillar ushbu tartibdan mustasno bo‘ladi.
Shuningdek, qaror loyihasida bolalar va yoshlar orasida yo‘l harakati qoidalarini targ‘ib qilish maqsadida “Yashil chiroq” tanlovi hamda “Eng namunali yo‘l harakati xavfsizligi ta’minlangan hudud” ko‘rik-tanlovlari o‘tkazilishi belgilangan.
Mazkur tashabbuslar “Xavfsiz yo‘l va xavfsiz piyoda” jamg‘armasi mablag‘lari hisobidan moliyalashtiriladi.
