Hukumatning 2025-yil 30-sentyabrdagi 614-son qarori bilan “Texnikumlarda xorijiy taʼlim tashkilotlari ishtirokida qoʻshma taʼlim dasturlarini joriy qilish tartibi toʻgʻrisida”gi nizom tasdiqlandi.
Mazkur tartibga koʻra, Oliy taʼlim, fan va innovatsiyalar vazirligi sohaga mas’ul vakolatli organ etib belgilandi. Endilikda ariza beruvchi qoʻshma taʼlim dasturini joriy etish uchun zarur hujjatlar bilan birga mazkur vazirlikka murojaat qiladi. Arizalar 15 ish kuni ichida koʻrib chiqiladi.
Talablar bajarilganda, texnikumlar xorijiy taʼlim tashkilotlari bilan shartnoma tuzib, qoʻshma dasturlar asosida oʻquvchi qabul qilishi mumkin boʻladi. Mazkur imkoniyat bitiruvchilarga nafaqat Oʻzbekistonda, balki xorijda ham tan olinadigan diplom yoki sertifikat olish imkonini beradi.
