O‘zbekistonda tinchlik va barqarorlikni mustahkamlash, yoshlarni zararli g‘oyalar ta’siridan himoya qilish hamda mahallalarda ijtimoiy hamjihatlikni qo‘llab-quvvatlash maqsadida Termiz shahrida navbatdagi seminar-trening tashkil etildi. Tadbir “Zo‘ravon ekstremizmni profilaktika qilish” loyihasi doirasida o‘tkazildi.
Seminarning asosiy vazifasi – mahalla yettiliklari ishtirokida chegaraoldi hududlarda radikallashuv xavfini erta aniqlash, ijtimoiy muhitni sog‘lomlashtirish va ekstremistik g‘oyalarning oldini olish bo‘yicha zarur bilim va amaliy ko‘nikmalarni shakllantirishdan iborat bo‘ldi.
Tadbirda mahalla raislari, huquqbuzarliklar profilaktikasi inspektorlari, yoshlar yetakchilari, xotin-qizlar faollari, nodavlat-notijorat tashkilotlar va fuqarolik jamiyati institutlari vakillari ishtirok etdi. Ular o‘z tajribalari bilan o‘rtoqlashib, o‘zaro fikr almashdilar.
Soha mutaxassislari tomonidan ekstremistik g‘oyalarning tarqalishiga qarshi kurashish usullari, aholiga mo‘ljallangan samarali targ‘ibot-tashviqot mexanizmlari hamda yoshlar bilan to‘g‘ridan-to‘g‘ri muloqot olib borish yo‘llari yuzasidan ma’ruzalar qilindi.
Yakunda amaliy mashg‘ulotlar va guruhiy muhokamalar tashkil etilib, ishtirokchilarga zo‘ravon ekstremizmga qarshi “ijtimoiy immunitet”ni shakllantirishga xizmat qiluvchi aniq tavsiyalar taqdim etildi.
