Ta’lim tizimida belgilangan eng muhim vazifalardan biri — maktabgacha ta’lim muassasalari qamrovini 80 foizdan oshirishdir. Bu nafaqat ta’lim sohasi, balki butun jamiyat hayotida ijtimoiy ahamiyat kasb etmoqda. Zero, maktabgacha ta’limga keng yo‘l ochish — kelajak avlodning bilimli, sog‘lom va barkamol bo‘lib voyaga yetishiga zamin yaratadi.
Ayni maqsadda viloyat hokimi Sherobod tumaniga tashrif buyurib, Kattabog‘ mahallasidagi 8-sonli maktabda maktab hududlarida davlat-xususiy sheriklik asosida tashkil etiladigan maktabgacha ta’lim muassasalari loyihalari bilan tanishdi. Ishchi guruh taqdimotida hududlar kesimida ishlab chiqilgan tashabbuslar, talab yuqori bo‘lgan joylarda bo‘sh yer maydonlaridan samarali foydalanish va mavjud imtiyozlar asosida yangi bog‘chalar qurish masalalari muhokama qilindi. Bu tashabbuslar, eng avvalo, mahalliy aholining ehtiyojiga mos yechim topishga xizmat qilishi bilan ahamiyatli.
Shu kuni viloyat hokimi va mas’ullar 86-sonli oilaviy poliklinikada ham bo‘lib, “Tibbiyotda 90 kunlik o‘zgarishlar” loyihasi doirasida amalga oshirilgan ishlar bilan tanishdi. Aholi salomatligini muhofaza qilish, tibbiy xizmat sifatini oshirish va tizimli xizmat ko‘rsatishni kuchaytirishga doir yangi vazifalar belgilab olindi. Sog‘lom avlodni tarbiyalash ta’lim bilan bir qatorda sifatli tibbiyot xizmatiga ham bog‘liq ekani ta’kidlandi.
O‘rganishlar davomida Termiz tumanidagi “Yangi O‘zbekiston” massivida olib borilayotgan qurilish va ijtimoiy loyihalar ham ko‘zdan kechirildi. Ularning samarali ijrosi nafaqat yangi turar-joylar, balki farovon va qulay hayot tarzini shakllantirishga qaratilgani alohida qayd etildi. Shu tariqa, ta’lim, sog‘liqni saqlash va ijtimoiy infratuzilmani rivojlantirishga qaratilgan har bir tashabbusning markazida inson manfaatlari turibdi. Bu esa jamiyatimizning ertangi kunini yanada barqaror va farovon qilishga xizmat qiladi.
