Jamila momo uylik bo‘ldi

Hammaning ham o‘z oilasi, muqim yashaydigan uyi — kichik bo‘lsa ham vatani bo‘lsin ekan. Aks holda yashashida, yeb-ichishida xalovat bo‘lmaydi. Aytganlarimiz zahmatini Jamila momochalik his etadigan odam bo‘lmasa kerak. 70 yoshdan oshgan momo farzandu nabiralari e’zozida keksalik gashtini suradigan pallada uysiz, sarson-sargardonlikda yashab kelayotganiga nima deysiz. Turmushga chiqmagan, farzandsiz momo 2 yil davomida Uzun tumanidagi “Yoshlik” mahallasida bir xonalik qarovsiz uyda yashab yurdi. Insonning tanasidan kuch ketganida issiq-sovug‘idan xabardor bo‘ladigan g‘amxo‘ri bo‘lmasa qiyin.
Jamila momo haqida eshitgan tadbirkor Ulug‘bek Boboyev momo taqdiriga jim qarab tura olmadi. Tuman hokimligi bilan kelishgan holda Qarashiq mahallasiga qarashli yerdan 0,02 sotix maydonga barcha sharoitlarga ega, atroflari o‘ralgan ikki xonali uy qurib berdi. Uy tayyor bo‘lgach, Jamila momoga topshirish marosimi bo‘lib o‘tdi. Ha, endi Jamila momoning ham o‘z uyi bor, saxovatpesha tadbirkordan yangi uyning kalitlarini olgan onaxon quvonch ko‘z yoshlarini yashira olmadi. Qo‘llarini duoga ochib, yurt tinchligini, saxovatpesha insonlar ishiga barokatlar tiladi.