200 million dollarlik kelishuvga erishildi

Xalqaro aloqalarni mustahkamlash tomonlarning savdo-iqtisodiy, siyosiy, turizm sohasi rivojiga xizmat qiladi. Ayni maqsadda Surxondaryo viloyati va Tatariston Respublikasi hududlari bilan savdo-iqtisodiy aloqalarni rivojlantirish, hududning iqtisodiy salohiyatini namoyish etish, investitsiya va turizmga oid taqdimotlar o‘tkazish maqsadida Surxondaryo viloyati hokimi Ulug‘bek Qosimov boshchiligidagi delegatsiya Tataristonda bo‘lib qaytdi.
Tashrif davomida viloyatmiz hokimi Ulug‘bek Qosimov Qozon shahrida Tatariston Respublikasi Prezidenti Rustam Minnixanov bilan uchrashdi. Delegatsiya a’zolari ishtirokida kengaytirilgan tarzda muzokaralar o‘tkazilib, hududlar o‘rtasida tashqi savdo aloqalarini kengaytirish, iqtisodiy, investitsiyaviy va turizm sohalarida o‘zaro hamkorlikni rivojlantirish hamda joriy yilning 4-oktyabrdagi tashrifda imzolangan memomrandum va shartnomalar ijrosini ta’minlash masalalari muhokama qilindi.
Muzokaralar yakunida ikki tomonlama va ko‘p qirrali aloqalarni kengaytirish, loyihalarni birgalikda amalga oshirish masalalari kelishib olindi. Yakunda umumiy qiymati 200 million dollarlik kelishuvlarga erishilib, shartnoma va memorandumlar imzolandi. Viloyatimiz rahbari Rustam Minnixanovni Surxondaryo viloyatiga amaliy tashrif bilan borishga taklif qildi.