Angliyaning Manchester shahrida joylashgan “Co Op Live Arena” majmuasida o‘tkazilgan professional boks oqshomida o‘zbekistonlik bokschilar muvaffaqiyatli ishtirok etdi.
Super og‘ir vazn toifasida ringga chiqqan Bahodir Jalolov xorvatiyalik Agon Smakichiga qarshi kechgan jangda ustunlik qildi. 10 raundga mo‘ljallangan bahsning 8-raundi boshida raqib jamoasi jangni davom ettirishdan voz kechdi va Jalolov texnik nokaut orqali g‘alaba qozondi. Bu uning professional ringdagi 18-g‘alabasi bo‘ldi.
Yana bir hamyurtimiz Javohir Ummataliyev esa yarim og‘ir vaznda polshalik Damian Drabikka qarshi ringga chiqib, ikkinchi raunddayoq nokaut bilan ishonchli g‘alabani qo‘lga kiritdi.
Ushbu natijalar o‘zbekistonlik bokschilarning xalqaro arenadagi nufuzi va sport salohiyati tobora ortib borayotganini yana bir bor tasdiqladi.
