9-may — Xotira va qadrlash kuni hamda Ikkinchi jahon urushidagi G‘alabaning 81 yilligi munosabati bilan Termiz shahridagi San’at saroyi majmuasida o‘tkazilgan bayram mushakbozligi voha ahli uchun unutilmas lahzalarga boy bo‘ldi.
Tungi osmonni bezagan rang-barang mushaklar nafaqat bayramona kayfiyat ulashdi, balki xalqimizning tinchlik va osoyishtalik qadri, ajdodlar xotirasiga bo‘lgan cheksiz hurmati hamda bugungi farovon hayotga shukronalik tuyg‘ularini yanada mustahkamladi.
Minglab fuqarolar va mehmonlar jam bo‘lgan ushbu tantana yurtdoshlarimiz birdamligi, mehr-oqibati va Vatanga sadoqatini namoyon etdi. Ayniqsa, yosh avlod qalbida tarixiy xotirani asrash, urush va mashaqqatli yillarni boshdan kechirgan fidoyilar jasoratini qadrlash tuyg‘ularini kuchaytirishda bunday tadbirlarning ahamiyati beqiyosdir.
Xotira va qadrlash — bu shunchaki sana emas, balki xalqimizning o‘z tarixiga, qahramon ajdodlariga va tinch hayot ne’matlariga bo‘lgan yuksak ehtiromidir.
