Sariosiyo tumanida bolalar ta’lim-tarbiyasi uchun yana bir qulay maskan foydalanishga topshirildi. Tumandagi 85-sonli umumta’lim maktabining bo‘sh turgan binosi to‘liq qayta ta’mirlanib, zamonaviy talablarga javob beradigan 90 o‘rinli maktabgacha ta’lim muassasasi sifatida qayta jihozlandi.
Mazkur muassasada bolajonlar uchun qulay va xavfsiz sharoitlar yaratildi — yorug‘ va keng guruh xonalari, o‘yin maydonchalari, dam olish burchaklari, oshxona hamda gigiyena xonalari zamonaviy jihozlar bilan ta’minlandi. Ta’lim jarayonini samarali tashkil etish uchun yangi o‘quv-uslubiy vositalar, didaktik materiallar va rivojlantiruvchi o‘yinlar olib kelindi.
Endilikda bu muassasada bolalar maktabgacha yoshdagi ta’lim va tarbiyaning barcha bosqichlarini sifatli o‘zlashtirish, ijodiy fikrlash, muloqot va jamoada ishlash ko‘nikmalarini rivojlantirish imkoniyatiga ega bo‘ladilar. Shuningdek, tajribali tarbiyachilar tomonidan bolalarning individual qobiliyatini ochish, jismoniy va aqliy rivojlanishini qo‘llab-quvvatlashga alohida e’tibor qaratiladi.
Yangi maktabgacha ta’lim muassasasining ishga tushirilishi natijasida tumanda bolalarni bog‘chalarga qamrab olish darajasi oshadi, ota-onalar uchun ham qulaylik yaratiladi. Eng muhimi, bu tashabbus ta’lim tizimidagi islohotlarning amaliy samarasini, yosh avlod tarbiyasiga qaratilayotgan yurt miqyosidagi e’tiborning amalda ifodasini yaqqol namoyon etadi.
