Ijtimoiy tarmoqlarda “Tashabbusli byudjet” loyihalariga ovoz berish evaziga pul va’da qilayotgan norasmiy Telegram botlari tarqalmoqda. Iqtisodiyot va moliya vazirligi fuqarolarni bunday takliflardan ogoh bo‘lishga chaqirdi.
Vazirlik ma’lumotiga ko‘ra, so‘nggi vaqtlarda va’da qilingan mablag‘lar berilmayotgani yuzasidan yuzlab murojaatlar kelib tushgan. Ayrim shaxslar loyihalarga ovoz to‘plash uchun fuqarolarga pul yoki boshqa moddiy qiymatliklarni taklif qilmoqda, biroq keyinchalik va’dasini bajarmayapti.
Qayd etilishicha, “Tashabbusli byudjet” doirasida ovoz berish faqat “Ochiq byudjet” axborot portali, uning Android va iOS ilovalari hamda Telegram’dagi rasmiy bot orqali amalga oshiriladi.
Amaldagi tartibga ko‘ra, ovoz berish uchun fuqarolardan pul undirilmaydi va berilgan ovozlar uchun moddiy rag‘batlantirish nazarda tutilmagan.
Ovoz berish jarayoni 31-avgust soat 23:59 gacha davom etadi.
Vazirlik fuqarolarni norasmiy botlardan foydalanmaslik, shaxsiy ma’lumotlarini begona shaxslarga bermaslik hamda firibgarlik holatlaridan ehtiyot bo‘lishga chaqirdi.
