Farzandga ism va familiya berish masalasi nafaqat huquqiy, balki milliy an’analar bilan ham chambarchas bog‘liq. Ota-onalarga farzandining familiyasini belgilashda qo‘shimcha imkoniyat yaratish maqsadida qonunchilikka yangi o‘zgartirish kiritilmoqda.
Amaldagi tartibga ko‘ra, bolaning familiyasi ota-onasining familiyasiga qarab belgilanadi. Shuningdek, milliy an’analarga muvofiq ota yoki ona tomonidan boboning ismi familiya sifatida berilishi mumkin.
Oila kodeksining 69-moddasiga kiritilayotgan o‘zgartirishga ko‘ra, endilikda otaning ismini ham bolaga familiya sifatida berish imkoniyati yaratiladi. Tegishli qonun senatorlar tomonidan ma’qullandi.
Senatorlarning ta’kidlashicha, mazkur tartib fuqarolarga qo‘shimcha qulaylik yaratib, milliy va diniy an’analarga muvofiq farzandiga familiya tanlash borasidagi xohish-istaklarini amalga oshirish imkonini beradi.
