Yoshlar festivali o‘zlikka, milliy qadriyat-u an’analarga qaytish fursati hamdir. Respublika Ma’naviyat va ma’rifat markazi Sherobod tuman bo‘linmasi, Maktabgacha va maktab ta’limi tuman bo‘limi, Madaniyat va turizm boʻlimi va Barkamol avlod bolalar maktabi bilan hamkorlikda 30-iyun — “Yoshlar kuni” munosabati bilan “Milliy qadriyatlar haftaligi” loyihalari doirasida “Badash – ajdodlarimiz ijod mahsuli!” deb nomlangan ma’naviy-ma’rifiy tadbir o‘tkazildi.
Tadbir davomida yoshlarning qo‘l mehnati bo‘lgan milliy hunarmandchilik buyumlari, turli svenir va milliy naqshlarimiz tushurilgan kiyim-kechaklar ko‘rgazmasi tashkil etildi. Tadbirga kelgan borki, ushbu ko‘rgazmaga maftun bo‘lib, undagi buyumlarga katta qiziqish bildirdilar.
Mo‘jazgina sahnada esa milliy kuy-qo‘shiqlar, unga hamohang tarzda raqslar ijro etildiki, bu barchada bayram kayfiyatini uyg‘ota oldi. Ayniqsa, yosh ijrochilar tomonidan badash ohangi yangradi. Doiralar zarbidan tomoshabinlar junbushga keldi. Tadbir bahonasida respublikada yuqori natijalarga erishgan yoshlar munosib taqdirlandi.
H.Baxtiyorova
