Har qadamda “Aqlli bekat”. O‘ziga xos xizmat ko‘rsatishni boshlagan bekatlarning, avtobus-u marshrut kutadigan xonasi ham ishbilarmon tadbirkorlar tomonidan band etilgan. Mo‘jazgina kafe yoki tamaddixona ko‘rinishini olgan bekatlarga esa yo‘lovchi kirishga haymiqadi. Natijada qishda sovuqda, yozda issiqda avtobus kutishga mahkum.
“Aqlli bekat”lardagi bunday holatga ko‘z yumib, avtobusga chiqsangiz, 5-10 daqiqalik manzilingizga 40 daqiqadan kamiga yeta olmaysiz. Sababi bekat nimaligini bilmaydigan yo‘lovchi-yu haydovchilar istagan joyiga to‘xtatishni odat qilishgan. 5 metr masofa yurmay avtobus yo‘lovchining istagiga ko‘ra to‘xtaydi. Vaqt esa kutib turmaydi. Qaniydi bekatlar yo‘lovchilar uchun xizmat qilsa-yu, avtobuslar faqat bekatlarda to‘xtasa, ortiqcha dahmazalarning oldi olinarmidi, deguvchilarning istagi amalga oshadigan bo‘ldi. Viloyat hokimi Ulug‘bek Qosimov viloyatda jamoat transportini rivojlantirish, bekatlar faoliyati, yangi avtobuslar harakatini yo‘lga qo‘yish bo‘yicha viloyat Transport boshqarmasining taqdimotlari bilan tanishdi.
Viloyat rahbari Termiz shahri va tumanlar markazlarida tashkil etilgan “Aqlli bekat”lar avvalo yo‘lovchilar uchun xizmat qilishi kerakligini taʼkidlab, masʼullarga bekatlarni yo‘lovchilar uchun doimiy ochiq bo‘lishini taʼminlash topshirig‘ini berdi.
S.Davlatova
