O‘zbek yoshlarining har sohada ildamlikni qo‘ldan boy bermay butun dunyoga kuch-qudratimizni, bilim va salohiyatimizni namoyon etayotgani quvonchli hodisa. Sportda shoda-shoda medallar bilan vatanga qaytayotgan yoshlarning yuzi yorug‘. Xalqning faxr-u iftixoriga aylangan. Ilm-fanda ham kam emasligimizni isbotlashga erishgan bir guruh sariosiyolik yoshlar Xitoy davlati Hong-Kong shahri mezbonligida “Osiyo xalqaro matematika olimpiadasi-2022”ning final bosqichida ishtirok etishdi.
Sariosiyo tumanidagi 1-sonli AFCHO‘IU maktabida 5-9-sinflarda tahsil olib kelayotgan Ramziddin Ahmadov, Azamat Hazratqulov, Mirshodibek va Baxtovar Rahmatullayevlar olimpiadada yurtimiz sha’nini himoya qilishdi. Berilgan topshiriq va amallarni qisqa fursatlarda to‘g‘ri va aniq bajara olgan yoshlar raqiblarini-da ortda qoldirishdi. Ular oltin medalni qo‘lga kiritib, O‘zbekiston bayrog‘ini yana bir bor yuksaklarga ko‘tarish baxtiga sazovor bo‘lishdi.
Hilol
