Fuqarolar bilan ochiq muloqot qilish, ularning muammolarini o‘z vaqtida tinglash va amaliy yechim topish davlat organlari faoliyatining muhim yo‘nalishlaridan biridir. Shu maqsadda Surxondaryo viloyatida shaxsiy qabullar izchil tashkil etilmoqda.
Navbatdagi qabul viloyat Xalq qabulxonasida Surxondaryo viloyati hokimining o‘rinbosari Sherali Jo‘rayev tomonidan o‘tkazildi. Unda 13 nafar fuqaro uy-joy, bandlik, kommunal xizmatlar, tadbirkorlikni qo‘llab-quvvatlash hamda boshqa ijtimoiy masalalar yuzasidan murojaat qildi.
Murojaatlarning bir qismi qabul jarayonidayoq ijobiy hal etildi, qo‘shimcha o‘rganishni talab qiladigan masalalar esa mas’ul idoralarga biriktirilib, ijrosi nazoratga olindi. Bunday qabullar fuqarolarning qonuniy manfaatlarini ta’minlash, dolzarb muammolarga tezkor yechim topish va davlat organlari bilan aholi o‘rtasidagi ochiq muloqotni yanada mustahkamlashga xizmat qilmoqda.
