Mehnat munosabatlarida xavfsiz, hurmatga asoslangan va kamsitishlardan xoli ish muhitini yaratish bugungi islohotlarning muhim yo‘nalishlaridan biri sanaladi. Shu maqsadda Mehnat kodeksiga xodimlarning huquqiy himoyasini kuchaytirishga qaratilgan yangi normalar kiritilishi rejalashtirilmoqda.
Qonunchilik palatasi tomonidan birinchi o‘qishda qabul qilingan qonun loyihasiga ko‘ra, ish joylarida shahvoniy shilqimlikka yo‘l qo‘yilmasligi Mehnat kodeksida alohida norma sifatida mustahkamlanadi.
Shuningdek, mehnat sohasida kamsitish belgilari ro‘yxati kengaytirilib, unga terining rangi va siyosiy qarashlar kabi mezonlar ham kiritilmoqda. Mazkur o‘zgarishlar xodimlarning huquqlarini yanada ishonchli himoya qilish, mehnat munosabatlarida tenglik tamoyillarini mustahkamlash hamda zamonaviy va adolatli ish muhitini shakllantirishga xizmat qiladi.
