Atrof-muhitni muhofaza qilish masalasi jamiyat taraqqiyoti, aholi salomatligi va millat kelajagini belgilab beruvchi strategik ustuvor yo‘nalishdir. Demakki, ekologiya ikkinchi darajali masala emas, balki davlat siyosatining ajralmas qismiga aylangan.
Mazkur masala bugun Sho‘rchi tumani uchun ham bevosita dolzarbdir. Hududda ekologik muammolar inson omili sabab tobora kuchayib, tabiatga jiddiy zarar yetkazayotgani ayni haqiqat.
BEFARQLIK OYNASI
Tumandagi eng og‘riqli muammolardan biri — maishiy chiqindilarning belgilanmagan joylarga tashlanishidir. Natijada, tuproq zaharlanib, suv manbalari ifloslanmoqda, atmosfera buzilmoqda.
Bu holat ekologik madani-yatning yetarli darajada shakllanmaganidan dalolat beradi.
Suv resurslaridan oqilona foydalanish masalasi ham achinarli holatda. Fermer xo‘jaliklarida irrigatsiya tizimlarini modernizatsiya qilish, suv ariqlarini betonlash ishlari ham sust. Natijada suv behuda yo‘qotilmoqda. Iqlim o‘zgarishi kuchayib borayotgan bir paytda bu holatni oqlab bo‘lmaydi.
KO‘RINMAS, AMMO XAVFLI
Atmosfera havosining ifloslanishi ham jiddiy tashvish uyg‘otmoqda. Ayrim issiqxonalar, hammomlar, g‘isht zavodlari ekologik meyorlarga rioya qilmasdan zararli tutunlarni havoga chiqarmoqda. Bu holat aholi salomatligiga ham bevosita tahdid solayotir.
SHUNCHAKI AKSIYA EMAS
Muammoning ildizi — eko-logik madaniyat yetishmasligi. Ayniqsa, yoshlar o‘rtasida tabiatga mas’uliyatli munosabatni shakllantirish dolzarb. “Yashil makon” umummilliy loyihasi aynan shu maqsadga xizmat qiladi.
Bugun tumanda ekologik muammolarni hal etish — kechiktirib bo‘lmaydigan vazifa. Tabiatni asrash faqat davlat idoralarining ishi emas, balki har bir fuqaroning kundalik burchiga aylanishi shart. Chunki tabiatni asrash — o‘z kelajagimizni asrashdir.
Diyor BEKMURODOV,
O‘zbekiston Ekologik partiyasi Sho‘rchi tuman Kengashi raisi
