“Boysun bahori” xalqaro folklor festivali doirasida xorijlik mehmonlar Boysun turizm majmuasida yaratilgan sharoitlar, milliy qadriyatlar va boy madaniy merosimiz bilan yaqindan tanishmoqdalar. Tadbir yurtimizning tarixiy an’analari va zamonaviy turizm salohiyatini keng namoyish etishi bilan dolzarb ahamiyat kasb etmoqda.
Festival davomida mehmonlarga milliy hunarmandchilik namunalari, an’anaviy liboslar, bezaklar va qadimiy urf-odatlar taqdim etilmoqda. Har bir burchakda tarix va madaniyat uyg‘unligi yaqqol sezilib, tashrif buyuruvchilarda katta taassurot uyg‘otmoqda.
Fransiyadan tashrif buyurgan mehmon — Mishel xonim festival haqidagi fikrlarini bildirib, tayyorgarlik jarayonlari unda chuqur taassurot qoldirganini ta’kidladi. Uning aytishicha, har bir detalda milliy an’analar, samimiy muhit va mehmondo‘stlik ruhi aks etgan bo‘lib, bu holat festivalga o‘ziga xos joziba bag‘ishlamoqda.
“Boysun bahori” kabi xalqaro festivallar nafaqat madaniy almashinuvni rivojlantiradi, balki O‘zbekistonning turizm salohiyatini dunyoga keng targ‘ib etishda muhim o‘rin tutadi.
