O‘zbekistonda xorijiy davlatlarda olingan ilmiy darajalarni tan olishning yangi tartibi rasman tasdiqlandi. Vazirlar Mahkamasining tegishli qaroriga ko‘ra, endilikda talabgorlar hujjatlarini davlat xizmatlari orqali topshirib, nostrifikatsiya jarayonidan o‘tkazadi.
Yangi tartib ilmiy darajalarni shaffof va tizimli ravishda tan olishni ta’minlaydi. Arizachilar davlat xizmatlari markazlari yoki my.gov.uz portali orqali murojaat qilib, zarur hujjatlarni taqdim etadi. Jarayon yakunida ijobiy xulosa berilgan taqdirda, nostrifikatsiya guvohnomasi rasmiylashtiriladi.
Mazkur yangilik xorijda ta’lim olgan mutaxassislar uchun muhim imkoniyat yaratib, ularning ilmiy salohiyatidan mamlakat taraqqiyotida samarali foydalanishga xizmat qiladi.
