Termiz tumanidagi “Yangi O‘zbekiston” massiviga tutash hududda tadbirkorlikni rivojlantirish va yangi ish o‘rinlari yaratish maqsadida “Texno Park” hamda yoshlar sanoat zonasi loyihalari amalga oshirilmoqda. Ushbu tashabbuslar kelgusida massivga ko‘chib keladigan aholi bandligini ta’minlashda muhim ahamiyat kasb etadi.
Viloyat hokimi Ulug‘bek Qosimov loyihalar ijrosi bilan joyida tanishib, tadbirkorlik subyektlarini joylashtirish va ularni qo‘llab-quvvatlash borasida olib borilayotgan ishlar yuzasidan mas’ul tashkilotlar hamda bank rahbarlarining axborotlarini tingladi.
Tashrif davomida yoshlar sanoat zonasida qurilish ishlarini o‘z vaqtida yakunlash, loyihalarni puxta rejalashtirish va hududni zarur muhandislik-kommunikatsiya tarmoqlari bilan ta’minlash bo‘yicha mas’ullarga aniq vazifalar belgilandi.
