Surxondaryo viloyatining qulay iqlimi va unumdor tuproqlari qishloq xo‘jaligi mahsulotlarini yil davomida yetishtirish va eksport qilish imkonini bermoqda. Shu maqsadda viloyat hokimi Ulug‘bek Qosimov Angor tumaniga tashrif buyurib, aholining amaliy tajribasi bilan tanishdi.
“Bahor” mahallasida yashovchi Yusuf Shobirov va Shavkat Pirmatov xonadonlarida qizil va tosh karam, gulkaram, brokkoli, Xitoy karami, lavlagi hamda daykon yetishtirish jarayonlari o‘rganildi. Ushbu mahsulotlar mahalladagi ko‘plab xonadonlarda yil davomida yetishtirilib, xorijiy bozorlarga eksport qilinmoqda.
Viloyat rahbari bu tajribani kengaytirish, aholiga ko‘mak berish va eksport jarayonlarini yanada soddalashtirish muhimligini ta’kidladi. Tashrif davomida meva-sabzavotlarni yig‘ib-terib olish ishlari, shuningdek, O‘simliklar karantini va himoyasi boshqarmasining faoliyati yuzasidan axborotlar tinglanib, kelgusidagi vazifalar belgilandi.
