2025-yil 28-oktyabrda Adliya vazirligi tomonidan “Mahalliy ijro etuvchi hokimiyat organlari xodimlari faoliyatining samaradorligini eng muhim ko‘rsatkichlar (KPI) asosida baholash tartibi” davlat ro‘yxatidan o‘tkazildi.
Mazkur tartibga ko‘ra, Qoraqalpog‘iston Respublikasi, viloyatlar, Toshkent shahri hamda tuman (shahar) hokimliklaridagi davlat fuqarolik xizmati lavozimlarini egallagan xodimlarning ish samaradorligi aniq, o‘lchanadigan va erishish mumkin bo‘lgan maqsadli ko‘rsatkichlar asosida baholanadi.
Baholash jarayoni maxsus “samardorlik.uz” elektron platformasi orqali amalga oshiriladi. Ushbu tizim hokimliklarda ochiqlik va hisobdorlikni kuchaytirish, xodimlarning ish samaradorligini oshirish hamda fuqarolarga ko‘rsatilayotgan xizmatlar sifatini yaxshilashga qaratilgan.
