Sariosiyo tumanidagi “Uz-Agro-Lider” MChJda Sariosiyo tuman hokimligi hamda “Turonbank” ATB hamkorligida “Limon hosili sayli” nomli ko‘rgazmali seminar bo‘lib o‘tdi. Tadbir limonchilar, bog‘bonlar va tadbirkorlar uchun tajriba almashish, yangi bilim va imkoniyatlar eshigini ochish maqsadida tashkil etildi.
Seminarda tuman hokimi Abduqodir Donayev, “Turonbank” ATB boshqaruv raisi o‘rinbosari R. Haydarov, qishloq xo‘jaligi sohasi mutasaddilari hamda viloyatning turli hududlaridan kelgan 80 nafardan ortiq limonchi fermerlar ishtirok etdi.
Tadbir davomida ishtirokchilarga limonchilikni rivojlantirish bo‘yicha davlat dasturlari, ilmiy va innovatsion yondashuvlar, xalqaro tajribalar, shuningdek, imtiyozli kreditlar, limon ko‘chatlarini parvarish qilish va eksport imkoniyatlari haqida batafsil ma’lumotlar berildi.
Shuningdek, limonni qayta ishlash, qadoqlash va eksport qilishga doir yangi loyihalar taqdimoti o‘tkazildi. Tadbir limonchilarga o‘zaro tajriba almashish, sohaga oid ilg‘or usullarni o‘rganish va amaliyotda qo‘llash imkonini yaratdi.
