O‘zbekiston hukumati qaroriga muvofiq, mahalliy hokimliklar har yili ehtiyojmand toifaga kiruvchi 150 nafar talaba-qizning kontrakt to‘lovini mahalliy budjet mablag‘lari hisobidan qoplab beradi. Prezidentning 2021-yil 5-martdagi PQ-5020-sonli qaroriga asosan, hokimliklar birinchi bosqichga qabul qilingan 40 nafar, ikkinchi va undan yuqori bosqichlarda tahsil olayotgan 110 nafar talaba-qizning bazaviy kontrakt to‘lovini moliyalashtiradi.
Mazkur imtiyoz quyidagi toifadagi qizlarga taalluqli:
Ijtimoiy himoya yagona reyestrida kam ta’minlangan deb qayd etilgan oilalardagi talaba-qizlar;
Yetim yoki ota-onasidan mahrum bo‘lgan qizlar;
Turmush o‘rtog‘i vafot etgan, voyaga yetmagan farzandlarini yolg‘iz tarbiyalayotgan ehtiyojmand ayollar.
Shu bilan birga, qarorda ayrim cheklovlar ham belgilangan. Jumladan, ikkinchi mutaxassislikda o‘qiyotganlar hamda O‘zbekistondagi xorijiy yoki xususiy oliy ta’lim muassasalarida tahsil olayotgan talaba-qizlarning kontrakt to‘lovlari davlat tomonidan qoplanmaydi.Ushbu tashabbus mahalliy budjet imkoniyatlaridan kelib chiqqan holda amalga oshirilib, jamiyatda gender tengligini ta’minlash, yosh qizlarning ta’lim olishi uchun qo‘shimcha imkoniyat yaratishga xizmat qilmoqda. Bu esa nafaqat o‘quvchi-yoshlarning, balki butun oilalar va kelajak avlodning ravnaqi uchun muhim qadamdir.
