Sariosiyo tuman hokimi Abduqodir Donayev boshchiligidagi ishchi guruh tumandagi umumta’lim maktablarining kuz-qish mavsumiga tayyorgarlik jarayonini atroflicha o‘rgandi. Tashrif davomida ta’lim muassasalarining qozonxonalari, isitish tizimlari va mavjud ko‘mir zaxirasi ko‘zdan kechirildi. Mazkur jarayonning bosh maqsadi – o‘quvchilar qishning sovuq kunlarida ham qulay sharoitda tahsil olishini ta’minlashdir.
O‘rganish jarayonida ayrim maktablarda issiqlik tizimini belgilangan meyorlarda ishlatish uchun qo‘shimcha chora-tadbirlar zarurligi qayd etildi. Shu bois mas’ullarga kamchiliklarni qisqa muddatda bartaraf etish, mavjud imkoniyatlardan samarali foydalanish va zarur joylarga ko‘mir yetkazib berish bo‘yicha aniq ko‘rsatmalar berildi.
Hudud rahbari ta’kidlaganidek, bugungi kunda har bir maktabda o‘quvchilarning bilim olishi uchun qulay muhit yaratish eng ustuvor vazifalardan biri hisoblanadi. Shu sababli qish mavsumiga puxta tayyorgarlik ko‘rish, ta’lim maskanlarini uzluksiz issiqlik bilan ta’minlash barchamizning umumiy mas’uliyatimizdir.
