Yurtimizda tadbirkorlikni qo‘llab-quvvatlash, ayniqsa ayollar va yoshlarning biznesini boshlashi uchun yaratilayotgan imkoniyatlar samarasi sifatida yangi tashabbuslar ortib bormoqda. Ana shunday faol va mehnatsevar tadbirkorlardan biri — Sho‘rchi tumanida yashovchi Tojinor Ishonqulovadir. U o‘zining mehnati, tashabbuskorligi bilan e’tibor qozonmoqda.
— Shirinlik tayyorlash kelinimning bolalikdagi qiziqishi bo‘lgan, uning orzularini amalga oshirishga birgalikda harakat qildik, — deydi Tojinor Ishonqulova. — Shirinlik tayyorlash va uni sotish uchun mo‘ljallangan maskanning faoliyat boshlashi natijasida 15 nafar fuqaroning bandligi ta’minlandi. Biz uchun mijozlarimizning mamnunligi eng katta mukofotdir. Tayyorlayotgan mahsulotlarimiz nafaqat ko‘rinishi, balki ta’mi bilan ham alohida ajralib turadi.
Maqsadida qat’iy bo‘lgan tadbirkor kelgusida faoliyatini kengaytirish, yangi ish o‘rinlarini yaratish va o‘z brendini rivojlantirishni ko‘zlagan.
