Bilim, amaliyot bilan boyigan tajriba insonni doimo yetuklikka yetaklaydi. Jamiyatga, atrofdagilar va oilasiga kerakli shaxsga aylantiradi. Bekkam aya Muzaffarovaning bilimlari, hayotiy boy tajribasi ana shunday insonga aylantirdi. El oldiga obro‘, hurmat qozonishiga sabab bo‘lgan bo‘lsa, farzand va nabiralar tarbiyasida o‘z yo‘li va maktabini yaratishga as qotdi. Aya hozirda 76 yoshni qarshilagan bo‘lsa-da, qo‘li mehnatdan qolgani yo‘q. Yosh avlodga shijoati, mehnati bilan o‘rnak va namuna. Hovlisidagi bir qarich yerni-da bekor qo‘yishni istamaydi. Gullatib-yashnatishni, nihol o‘stirib, mehnatidan hosil olishni hush ko‘radi. Kaftdekkina yerida 500 tupdan ziyod 8 turdagi uzum navlarining shig‘il-shig‘il hosil berib turgani ko‘rgan ko‘zni quvnatadi. Bekkam aya ro‘zg‘orda, tarbiyada bekam-u ko‘st.
Qumqo‘rg‘on tumani “Jiydali” mahallasida “Yangi O‘zbekistonning ibratli oilasi” shiori ostida o‘tkazilgan viloyat seminari ishtirokchilari uchun Bekkam aya Muzaffarovaning xonadoni namuna sifatida ko‘rsatildi.
Tashrif davomida onaxon mehnatlari e’tirof etildi va esdalik sovg‘alari topshirildi. Qahramon ayolning qimmatli fikrlari, maslahat va nasihatlari esa seminadagi esda qolarli master-klass bo‘ldi. Mana shunday insonlar ibrati yosh oilalarning mustahkam bo‘lishiga eng yaxshi maktab vazifasini o‘tashiga shubha yo‘q.
S.Murodova
