Termiz shahrida “Sport bilan baxtli hayot sari!” shiori ostida xotin-qizlar o‘rtasidagi sport musobaqalarining viloyat bosqichi yuqori saviyada tashkil etildi.
Tadbirning asosiy maqsadi — mahallalarda yashovchi ayollarni sportga keng jalb etish, sog‘lom turmush tarzini ommalashtirish hamda ularning jismoniy faolligini oshirishdan iborat bo‘ldi.
Musobaqalarda viloyatning turli shahar va tumanlaridan kelgan jamoalar yengil atletika, stol tennisi hamda shaxmat-shashka yo‘nalishlarida o‘zaro bellashdilar.
Qizg‘in va murosasiz o‘tgan bahslarda ishtirokchilar nafaqat sport mahoratini, balki jamoaviylik va sog‘lom raqobat muhitini ham namoyon etdilar.
Tadbir yakunida g‘olib va sovrindorlar diplom, medal hamda esdalik sovg‘alari bilan taqdirlandi. Musobaqa xotin-qizlar o‘rtasida sportni ommalashtirish va sog‘lom hayot tarzini mustahkamlashda muhim ahamiyat kasb etdi.
