Inson qaysi kasb egasi bo‘lishidan qat’iy nazar til bilishi zamon talabiga aylangan. Ilm yo‘lidan ketamizmi yoki tadbirkorlik, albatta, til bilsak, imkoniyatlarimiz kengayadi, dunyo bilan yuzlashib, o‘z sohamizda muvaffaqiyatlarga erishishimiz tayin. Sho‘rchi tuman hokimi U.Zokirov Sho‘rchi kasb-hunarga o‘qitish markazida bo‘lib, hunar o‘rganayotgan xotin-qizlar bilan suhbatlashar ekan, hunar va til o‘rgangan inson jamiyat uchun doimo naf keltirishini, har bir inson o‘z o‘rnini topishi uchun biror chet tili va hunarni mukammal o‘rganishi zarurligini taʼkidladi.
Bibiniso Meliqulova 39 yoshda, 5 nafar farzandning onasi. Tikuvchilikka bo‘lgan mehr-muhabbati sabab ushbu markazda tikish-bichish sirlarini o‘rganayotir. Qisqa muddatda qo‘li kelishib, tikish-bichishda ustozlaridan qolishayotgani yo‘q. Bo‘lajak tikuvchi ayol marrani katta olgan, tikuvchilik kurslarini tamomlagach, albatta, ingliz tilini ham o‘rganmoqchi. Kelgusida o‘z faoliyatini boshlashi va rivojlantirishda bu muhim ekanini ta’kidlaydi B. Meliqulova.
Sho‘rchi kasb-hunarga o‘qitish markazida Bibiniso kabi 274 nafar ishsiz fuqaro jalb qilingan. Hozirgi kungacha 151 nafari kurslarni tamomlab, sertifikat olishgan bo‘lsa, 123 nafari o‘qish jarayonida.
S.Murodova
