Termizda O‘zbekiston–Afg‘oniston biznes aloqalarini yangi bosqichga olib chiqishga qaratilgan amaliy muloqotlar davom etmoqda.
“Termiz xalqaro savdo markazi” erkin savdo zonasida O‘zbekiston–Afg‘oniston yengil sanoat mahsulotlari ko‘rgazmasi boshlandi. Unda O‘zbekistondan 90 dan ortiq, Afg‘onistondan esa 60 dan ziyod kompaniya vakillari ishtirok etmoqda.
Ko‘rgazmada to‘qimachilik, trikotaj, tayyor kiyim-kechak, charm-poyabzal, gilam va boshqa mahsulotlar namoyish etilib, tadbirkorlar o‘rtasida B2B uchrashuvlar va ikki tomonlama muzokaralar o‘tkazilmoqda.
Muloqotlarda yangi savdo sheriklarini topish, eksport shartnomalarini tuzish, ishlab chiqarish kooperatsiyasini yo‘lga qo‘yish hamda Afg‘oniston bozoriga mahalliy mahsulotlarni kengroq olib chiqish masalalari muhokama qilinmoqda.
Ko‘rgazma ikki davlat tadbirkorlarini bevosita bog‘lab, yangi shartnomalar, savdo yo‘nalishlari va hamkorlik loyihalari uchun muhim biznes maydoniga aylanmoqda.
