Mustaqilligimizning 35 yilligi arafasida Sariosiyo tumanida bunyodkorlik ishlari izchil davom etib, aholiga munosib sharoitlar yaratishga qaratilgan yangi ijtimoiy obyektlar foydalanishga topshirilmoqda. Ana shunday ezgu ishlardan biri Turmush obod mahallasidagi 43-sonli umumta’lim maktabida amalga oshirildi. Investitsiya dasturi doirasida maktab uchun qo‘shimcha 300 o‘rinli zamonaviy o‘quv binosi barpo etilib, foydalanishga topshirildi.
Yangi bino o‘quvchilarning sifatli ta’lim olishi, zamonaviy bilim va ko‘nikmalarni egallashi uchun zarur sharoitlarni yaratadi.
Ochilish marosimida Sariosiyo tumani hokimi Odiljon Yaqubov, ta’lim sohasi mas’ullari, nuroniylar, maktab jamoasi, ota-onalar hamda jamoatchilik vakillari ishtirok etdi.
Tadbirda so‘zga chiqqan tuman hokimi yig‘ilganlarni Mustaqillik bayrami bilan samimiy tabriklab, mamlakatimizda ta’lim tizimini rivojlantirish va yoshlar uchun zamonaviy imkoniyatlar yaratishga qaratilayotgan e’tibor haqida so‘z yuritdi.
Yangi o‘quv binosining foydalanishga topshirilishi Sariosiyoda bayram arafasidagi bunyodkorlik ishlarining yana bir amaliy ifodasi bo‘ldi. Endilikda yuzlab o‘quvchilar zamonaviy va qulay sharoitlarda ta’lim olish imkoniyatiga ega.
