O‘zbekistonda uyushgan guruh tarkibida bezorilik sodir etganlik uchun 14 yoshdan jinoiy javobgarlik belgilash nazarda tutilmoqda. Shuningdek, noqonuniy jangovar sport musobaqalarini tashkil etish yoki o‘tkazish uchun jinoiy, ularda qatnashish uchun esa ma’muriy javobgarlik joriy etilmoqda.
Jinoyat kodeksiga jinoiy uyushma faoliyatini moliyalashtirish uchun ham javobgarlik kiritilmoqda. Hokimiyat yoki mansab vakolatlaridan foydalanib, jinoiy uyushma tashkil etilishiga yoki uning jinoyatlarini yashirishga homiylik qilganlik uchun ham alohida javobgarlik belgilanadi. Tegishli qonun Senatning 20-yalpi majlisida ma’qullandi.
