Mustaqilligimizning 35 yilligi arafasida Oltinsoy tumanida yosh avlod uchun yana bir munosib tuhfa amalga oshirildi. “Ovchi” mahallasidagi 26-sonli umumiy o‘rta ta’lim maktabi mukammal ta’mirdan chiqarilib, foydalanishga topshirildi. Investitsiya dasturi doirasida ajratilgan 3,809 milliard so‘m mablag‘ evaziga maktab to‘liq rekonstruksiya qilinib, o‘quvchilar uchun zamonaviy, shinam va qulay ta’lim muhiti yaratildi.
Yangilangan ta’lim maskanining ochilish marosimida Oltinsoy tumani hokimi Otabek Mavlyanov, tuman prokurori Ravshan Turdiyev, nuroniylar, jamoatchilik vakillari hamda soha mas’ullari ishtirok etdi. Endilikda maktab o‘quvchilari yangilangan va zamonaviy sharoitlarda ta’lim olib, bilim va ko‘nikmalarini yanada rivojlantirish imkoniga ega bo‘ladilar.
Bayram arafasida foydalanishga topshirilgan ushbu ta’lim maskani yurtimizda yosh avlod kelajagiga, sifatli ta’lim va inson kapitaliga qaratilayotgan e’tiborning yorqin ifodasidir.
