Yangi o‘quv yilini munosib kutib olish, bolajonlarni maktabga zarur o‘quv qurollari bilan ta’minlash va ularga birinchi kundanoq quvonch ulashish maqsadida “Prezident sovg‘alari” an’anasi davom ettirilmoqda.
2026/2027-o‘quv yili uchun birinchi sinf o‘quvchilariga mo‘ljallangan “Prezident sovg‘alari”ni hududlarga yetkazish boshlandi. O‘quv qurollari 15-avgustga qadar barcha hududlarga, 25-avgustga qadar esa birinchi sinfga qabul qilingan o‘quvchilar soniga mos ravishda maktablarga to‘liq yetkazilishi rejalashtirilgan. To‘plamlar “Birinchi qo‘ng‘iroq” tadbirlaridan so‘ng o‘quvchilarga tantanali ravishda topshiriladi.
12 turdagi o‘quv qurolidan iborat to‘plamga maktab sumkasi, daftarlar, ruchka va qalamlar, rangli qalamlar, rangli qog‘oz, plastilin, rasm daftari, o‘chirg‘ich, akvarel bo‘yoqlari, yelim hamda qalamdon kiritilgan.
“Prezident sovg‘alari” davlat maktablari bilan bir qatorda nodavlat ta’lim muassasalari hamda boshqa vazirlik va idoralar tasarrufidagi maktablarda tahsil oladigan birinchi sinf o‘quvchilariga ham yetkaziladi. Bu jarayonda har bir bolani o‘quv qurollari bilan o‘z vaqtida ta’minlash uchun elektron platforma orqali o‘quvchilar ro‘yxati shakllantirilgan.
Yangi o‘quv yilida respublika bo‘yicha 795 mingdan ortiq bolaning 1-sinfga qabul qilinishi rejalashtirilgan. 5-avgust holatiga ko‘ra, 680 ming nafardan ortiq bola maktabga qabul qilingan bo‘lib, bu rejaning 85 foizini tashkil etadi.
