Bugungi axborot texnologiyalari asrida smartfon va internet hayotimizni batamom egallab olgandek tuyulsa-da, kitobning oʻrni va ahamiyati hech qachon yoʻqolmaydi. Kitob — insoniyat yaratgan eng buyuk moʻjizalardan biridir. U shunchaki varoqlar toʻplami emas, balki asrlar davomida toʻplangan bilim va tajribalar xazinasidir.
Kitob mutolaasining foydalari. Muntazam kitob oʻqish inson shaxsiyatini shakllantirishda quyidagi muhim vazifalarni bajaradi:
1. Dunyoqarashni kengaytiradi: Kitoblar bizga biz hech qachon boʻlmagan davrlar va mamlakatlarga sayohat qilish imkonini beradi.
2. Nutq va soʻz boyligini oshiradi: Koʻp kitob oʻqigan insonning nutqi ravon, fikrlashi teran va suhbatdoshiga taʼsir oʻtkazish qobiliyati yuqori boʻladi.
3. Miyani mashq qildiradi: Mutolaa jarayonida miya faol ishlaydi, xotira mustahkamlanadi va tahliliy fikrlash rivojlanadi.
4. Stressdan xalos etadi: Yaxshi asar mutolaasi insonni kundalik tashvishlardan chalgʻitadi va ruhiy xotirjamlik baxsh etadi.
Hozirgi kunda kitobga qiziqish kuchayib borayotganini koʻrish quvonarli hol. Kutubxonalar, kitob doʻkonlari gavjumligini koʻrib sevinib ketaman. Chunki ular kitobga mehr koʻzi ila boqishmoqda! Ammo shuni aytib oʻtishni istardimki, kitoblarni saralab oʻqish kerak. Bu juda muhim! Ayni kunda vaqtning bahosiga teng keladigan narsaning oʻzi yoʻq! Vaqtingizning qadriga eting! Uni keyin topishingiz qiyin boʻladi.
Kitobni oʻqiganda shunchaki oʻqib ketmasdan, diqqat bilan, asosiy fikrlarni daftarlarga qayd etib, tahliliy mushohada yuritgan holda oʻqilsa maqsadga muvofiq boʻlardi. Axir, bugun shunchaki oʻqib ketadigan zamon emas. Bugungi davr buni aslo qabul qilmaydi. Dunyo adabiyotini tartib va reja bilan oʻqib chiqishni niyat qiling! Albatta, bu niyat yoʻlingizni yoritadi.
Kitob — millat tayanchi, kelajak poydevoridir! Bu tayanchni, kelajakni asraylik! Yurtimizda kitobxonlikni rivojlantirishga juda katta eʼtibor qaratilmoqda. Buyuk mutafakkirlarimiz aytganidek, kitobsiz uy — ruhsiz tanaga oʻxshaydi. Hayotimizni mazmunli va yorugʻ qilish uchun kitob bilan doʻst boʻlishimiz shart.
D. Irgashova,
Uzun tuman Axborot-kutubxona markazi mutaxassisi
