Jahon banki ijrochi direktorlar kengashi tomonidan Surxondaryo viloyatida transport infratuzilmasini modernizatsiya qilishga qaratilgan 200 million AQSH dollarlik loyiha ma’qullandi.
Loyiha doirasida M41 avtomobil yo‘lining 91 kilometrlik qismi rekonstruksiya qilinib, mavjud 2 qatorli yo‘l 4 qatorliga aylantiriladi. Natijada o‘rtacha harakat tezligi 65 km/soatdan 90 km/soatgacha oshishi kutilmoqda.
Shuningdek, loyiha yo‘l qoplamasini yaxshilash, 180 ga yaqin ko‘prik va drenaj inshootlarini qurish hamda rekonstruksiya qilishni, yo‘l harakati xavfsizligini oshirishni nazarda tutadi.
Bundan tashqari, multimodal transport strategiyasini ishlab chiqish hamda O‘zbekiston temir yo‘llari tizimida boshqaruv va samaradorlikni oshirishga qaratilgan chora-tadbirlar ham qo‘llab-quvvatlanadi.
Mazkur loyiha transport aloqalarini mustahkamlash, iqtisodiy imkoniyatlarni kengaytirish va yangi ish o‘rinlari yaratishga xizmat qiladi.
