Yurtimizga mehr-oqibat, xayr-u saxovat va shukronalik ruhini olib kelgan muqaddas Ramazon oyi munosabati bilan joylarda ezgu va savobli ishlarga alohida e’tibor qaratilmoqda. Termiz tumani hokimi Shuxrat Qalandarov rahbarligida Ramazon oyida xayr-ehson tadbirlarini tizimli tashkil etish, kam ta’minlangan va ko‘makka muhtoj oilalar holidan xabar olish masalalariga bag‘ishlangan yig‘ilish bo‘lib o‘tdi. Unda tuman bosh imom-xatibi Saidmuhammad Saidov ishtirok etib, muborak oyda amalga oshiriladigan xayrli amallarning savobi va barokati xususida ma’ruza qildi.
Tuman hokimining tashabbusi bilan mahallalar kesimida saralab olingan 359 ta kam ta’minlangan oilaga 100 dan ortiq rahbar va mas’ullar biriktirildi. Ularga har bir oilaning holidan xabar olish, moddiy va ma’naviy qo‘llab-quvvatlash, mavjud muammolarini joyida hal etish bo‘yicha aniq vazifalar yuklatildi.
Tuman rahbari mazkur ishlar rasmiyatchilik uchun emas, balki savob va insoniylik tamoyillariga sodiq holda, chin yurakdan amalga oshirilishi zarurligini ta’kidladi.
