Prezident Shavkat Mirziyoyev O‘zbekistonda Ijtimoiy soha muassasalarini qurish va ta’mirlash jamg‘armasini tashkil etish to‘g‘risidagi qarorni imzoladi. Mazkur jamg‘arma maktablar, sport inshootlari va shifoxonalarni qurish, ta’mirlash hamda qayta qurish, shuningdek, ta’lim, sport va tibbiyot muassasalarini zarur jihozlar, infratuzilma va texnika bilan ta’minlashni moliyalashtiradi.
Jamg‘armaga Ijtimoiy himoya davlat jamg‘armasidan 2 trillion so‘m ajratiladi. Bundan tashqari, 2026-yil boshida respublika ijro etuvchi hokimiyat organlari huzuridagi budjetdan tashqari jamg‘armalar mablag‘larining bir qismi, shuningdek, ayrim vazirlik va idoralar jamg‘armalaridan qo‘shimcha mablag‘lar yo‘naltiriladi.
Mazkur qaror Prezidentning Oliy Majlisga yo‘llagan murojaatnomasida belgilangan mahallalardagi muammolarni hal etish, mahalliy budjetlarni mustahkamlash va infratuzilmani rivojlantirishga qaratilgan chora-tadbirlar doirasida qabul qilindi. Ushbu choralar natijasida tumanlarga infratuzilma uchun qo‘shimcha 5 trillion so‘m ajratilishi kutilmoqda.
