Yoshlarning ma’naviy dunyosini boyitish, kitobxonlik madaniyatini yanada rivojlantirish va bilimga chanqoqlikni oshirish maqsadida yo‘lga qo‘yilgan “Yoshlar uchun 1000 kitob” tashabbusi doirasida tashkil etilgan “Kitob karvoni” Surxondaryo viloyatiga yetib keldi.
Termiz shahridagi “Yoshlar markazi”da o‘tkazilgan tadbirda viloyat Yoshlar ishlari boshqarmasi mutaxassislari tomonidan loyiha doirasida taqdim etilgan nodir kitoblar jamlanmasi shahar va tuman Yoshlar ishlari bo‘limlari mutaxassislariga topshirildi.
Mazkur kitoblar keyinchalik hududlardagi yoshlar markazlari, kutubxonalar va ta’lim muassasalari orqali yoshlarga yetkaziladi.
“Kitob karvoni” — bu shunchaki kitoblar to‘plami emas, balki bilim, tafakkur, madaniyat va ilhom karvonidir. Karvon tarkibida yangi nashr etilgan badiiy va ilmiy asarlar, jahon va o‘zbek adabiyotining mashhur klassik hamda zamonaviy yozuvchilari ijodidan namunalar, shuningdek, yoshlar dunyoqarashini kengaytiruvchi motivatsion va tarbiyaviy adabiyotlar o‘rin olgan.
Ushbu tashabbus yoshlarni kitobga oshno etish, ularning tafakkurini boyitish va intellektual salohiyatini yuksaltirish sari muhim qadamlardan biri bo‘lib, Surxondaryo yoshlari uchun haqiqiy ma’naviyat bayrami bo‘ldi.
